Hetuesit francezë kanë filluar një hetim për të identifikuar viktima të tjera të një kirurgu pedofil, i cili tashmë po gjykohet për përdhunimin ose sulmin seksual të 299 pacientëve, të cilët përgjithësisht janë të rinj. Kirurgu në fjalë, Joël Le Scouarnec, 74 vjeç, ka pranuar të gjitha akuzat në një nga rastet më të mëdha të abuzimit të fëmijëve në Francë. Ai ka deklaruar se “ka kryer veprime të urryera” gjatë fillimit të gjyqit muajin e kaluar, pasi më parë kishte mohuar disa nga akuzat.

Avokati i tij, Maxime Tessier, ka njoftuar se klienti i tij ka pranuar se të gjithë individët e përmendur në shënimet e tij ishin viktima të abuzimit. Zyra e prokurorit publik në Rennes ka nisur një hetim të ri për identifikimin dhe gjurmimin e viktimave të tjera të përmendura në shkrimet e Le Scouarnec.

Gjatë gjyqit në Vannes, në perëndim të Francës, u dëgjua se shumica e viktimave ishin abuzuar gjatë kohës që ishin nën anestezi ose në fazën e shërimit nga operacionet midis vitit 1989 dhe 2014, periudhë kur kirurgu punonte në institucione mjekësore në Brittany dhe Francën perëndimore.

Pranimi i Le Scouarnec erdhi pas provave të paraqitura nga disa prej 158 viktimave meshkuj dhe 141 femra. Avokatja Frédérique Giffard, që përfaqëson 15 prej viktimave, e përshëndeti pranimin e kirurgut dhe tha se kjo ishte një hap i rëndësishëm për viktimat.

Le Scouarnec aktualisht po vuajt një dënim prej 15 vjetësh burg për abuzimin seksual të katër vajzave të reja. Gjatë një kontrolli në shtëpinë e tij për prova, policia zbuloi materiale të abuzimit seksual të fëmijëve, duke përfshirë foto dhe video, si dhe një koleksion kukullash në madhësi reale.

Gjyqi po heton se si kirurgu u lejua të punonte pas dënimit të tij në vitin 2005 për posedim të imazheve të abuzimit seksual të fëmijëve. Disa raste janë pushuar për shkak të kalimit të afatit për ndjekje penale. Avokatja Francesca Satta tha se hetimi kishte zbuluar një situatë shqetësuese për viktimat e Le Scouarnec, shumica e të cilave janë sot në moshën 30-40 vjeç dhe mësuan për abuzimin vetëm kur policia u shfaq në shtëpitë e tyre.

—