Ramush Haradinaj, në postimin e tij të fundit në Facebook, ka kujtuar masakrën e tmerrshme që ndodhi në Likoshan dhe Qirez në fund të shkurtit 1998. Ai thekson se kjo ishte një hakmarrje barbare e forcave serbe, e cila u krye pas humbjeve të Ushtrisë Çlirimtare të Kosovës. Masakra, sipas tij, shënoi fillimin e vrasjeve masive të shqiptarëve të Kosovës, spastrimin etnik dhe shkatërrimin e pasurisë së tyre. Haradinaj përulet me nderim para sakrificës së martirëve dhe shpreh solidaritetin e tij me familjet që kanë humbur të dashurit e tyre.

Postimi origjinal:
“Likoshani dhe Qirezi u bënë dëshmitarë të një prej akteve më të tmerrshme të makinerisë shtypëse serbe. Në fund të shkurtit 1998, të tronditura nga humbjet e Ushtrisë Çlirimtare të Kosovës, forcat serbe reaguan me hakmarrje barbare, duke vrarë gra, pleq, fëmijë dhe të rinj të pafajshëm.

Kjo masakër, e kryer nga policia dhe ushtria serbe, shënoi fillimin e vrasjeve masive të shqiptarëve të Kosovës, spastrimin etnik dhe shkatërrimin e pasurisë së tyre. Përulemi me nderim para sakrificës së martirëve që jetën ia falën atdheut. Bashkëndjejmë me familjet që kanë humbur më të dashurit e tyre. Ishim me ta, jemi sot dhe përgjithmonë!”